• 26 Fevral 2020
  • Dollar: 1.7 , Avro: 1.9309 , Rus rublu: 0.026 Türk lirəsi: 0.3202

Əli Kərimli - Radikal sözünün sinonimi

15:29 27/01/20 | Sosial

Nə məsələdirsə, radikal sözünü eşidən, duyan kimi ağla ilk gələn Kərimov Əli olur. Amma adını belə çağıranda əsəbiləşir, daha da aqressivləşir. Onsuz da hər halı əsəb, hər halı aqressiya, hər halı kin-küdurətdir. Ona görə əlavə yük olmayaq, elə biz də Əli Kərimli deyək. O Əli Kərimli ki, fəaliyyətini ancaq neqativlər üzərində qurub. Gördüyü isə ancaq qara rəngdir. Sanki 90-cı illərin eyforiyasından hələ də qurtula bilməyib, evində isə LCD ekran əvəzinə, ancaq ağ-qara televizora baxır, kanalları kəlbətinlə dəyişir...

İnanmırsınızsa, gəlin bir az daha dərinə gedək. Sual edirəm, indiyədək Əli Kərimlinin ağzından kimsə xoş, pozitiv bir şey eşidibmi, bəlkə kimsə onun Azərbaycan dövlətinin, xalqının namına yaxşı bir fikir söylədiyini, obyektiv bir ideya, təklif səsləndirdiyini eşidib?! Ancaq qərəz, kin, aqressiya... Özü də ümumi "siyasi" fəaliyyətini ancaq konkret istiqamətlər üzrə qurub.

Bunlar hansılardır? Birincisi, ölkədə baş verən neqativ hadisələr - fərq etməz, bu, təbii hadisədir, yoxsa hər hansı bir qəzayi-bəla. O saat açır "Facebook"u, başlayır moizəyə. Ardınca da trol komandasına əmr edir ki, "layk"layın.

İkincisi, ölkə əhəmiyyətli hər hansı bir yaxşı hadisə baş verən kimi Əli Kərimlidə dərhal onu gözdən salmaq istəyi baş qaldırır. Yenə də ağzına və əlinə gələnləri yazıb və ya Sevincin (S.Osmanqızı) kanalında danışıb insanların ikrahını qazanır.

Üçüncü əsas istiqamət isə anti-Azərbaycan dairələrin, erməni lobbisinin dəyirmanına dən tökməkdir. Elə ki, erməni lobbisinin birbaşa diqtəsi və təsiri ilə adını beynəlxalq təşkilat qoyan bir qurum Azərbaycan əleyhinə hər hansı bir neqativ, qərəzli fikir və ya bəyanat səsləndirdi, pah atonnan, bununla da Əli Kərimlinin gözlərinə işıq gəlir. O saat başlayır onu təqdir etməyə və bunun fonunda Azərbaycanı ləkələməyə...

Bu adamın digər bir fəaliyyət istiqaməti də istənilən məsələdə Azərbaycanı Ermənistanla müqayisə etməkdir. Hər vəchlə korrupsiya, anti-demokratiya girdabında boğulan Ermənistanı yüksəltməyə, sürətlə inkişaf edən, demokratik inkişaf yolunda ciddi əməli addımlar atan Azərbaycanı isə aşağılamağa çalışır. Halbuki, dedikləri həqiqət olsa belə heç bir siyasətçi, heç bir müxalifətçi öz ölkəsini düşmən ölkə ilə müqayisədə aşağılamamalıdır. Əksinə, öz dövlətinin, millətinin təəssübünü çəkməlidir. Əgər başda Əli Kərimli olmaqla, radikal müxalifət təmsilçiləri bir tək bunu dərk etsəydilər, onda hər şey fərqli olardı. Azərbaycanda sağlam müxalifət, tənqid və siyasi mübarizə mühiti olardı.

Bu sadalanan istiqamətlər üzrə onlarla misal, fakt göstərmək olar. Amma artıq gərək yoxdur. Çünki hər kəs bu deyilənlərin aksioma olduğunu, yəni isbata ehtiyacı olmadığını bilir.

Sonda hər zaman maraqlı olan bir məsələyə toxunmaq istərdim. Görəsən, Mark Zukerberq "Facebook"u yaratmasaydı, Kərimov Əli, yox ey, Əli Kərimli ürəyini hara boşaldardı?..


Facebook

Instagram

Youtube

SORĞU


“KOROĞLU” dastanını bəyənirsinizmi?