• 29 May 2020
  • Dollar: 1.7 , Avro: 1.8981 , Rus rublu: 0.0263 Türk lirəsi: 0.2814

"Ovçu"nun başqa dillərə tərcümə olunması məqsədəmüvafiqdir

11:06 23/05/20 | Sosial

Qafar Əliyev: "Belə əsərlər gənclərin vətənpərvərlik ruhunun formalaşmasında əhəmiyyətli rol oynayır"

Siyasi elmlər üzrə fəlsəfə doktoru Qafar Əliyev tarixi əsərlər müəllifi, yazıçı, publisist, "Olaylar" İnformasiya Agentliyinin baş redaktoru Yunus Oğuzun Aprel döyüşlərində qəhrəmancasına həlak olan Milli Qəhrəman Murad Mirzəyevin həyat və döyüş yolundan bəhs edən "Ovçu" romanı haqqında fikirlərini bölüşərkən qeyd edib ki, 2016-cı  il Aprel döyüşləri həqiqətən müasir müstəqil Azərbaycan Respublikasının ordu quruculuğunda, hərb tarixində qızıl hərflərlə yazılmış bir səhifə oldu. Bu, qəhrəmanlıq səhifəsi idi. Həmçinin bu, Dağlıq Qarabağ məsələsi ətrafında başlanmış olan müharibənin gedişində bir strateji təşəbbüsün ələ alınması anıydı. Məhz həmin döyüşlərin nəticəsindən sonra Azərbaycan xalqı bütün dünyaya nümayiş etdirdi ki, Azərbaycan Ordusu öz torpaqlarını işğaldan azad etməyə qadirdir, Azərbaycan xalqı vuruşmağa və erməni işğalçılarını yerində oturtmağa qadirdir. Lakin müəyyən bəlli güclər və qüvvələr çox narahat oldular, döyüşü xahiş-minnətə düşərək dayandırdılar.

Qafar Əliyev qeyd edir: «Döyüşlər başlayan andan beynəlxalq hadisəyə çevrilmişdi. Dünyanın hər yerindən - ABŞ Dövlət Departamentindən, Avropa Şurası, ATƏT, Moskva və digər yerlərdən bu hadisəyə ciddi münasibət göstərildi. Bu döyüş həm də bir lakmus rolunu oynadı. Azərbaycanın dostları ölkəmizin müdafiəsinə qalxdılar, haqq işimizi dünyanın müxtəlif ölkələrində müdafiə etdilər, bu döyüşlərdə haqlı olduğumuzu göstərdilər. Düşmənlərimiz isə təbii ki, ermənilərin müdafiəsinə qalxdılar, Azərbaycan Ordusunun fəaliyyətini, hərbi əməliyyatları dayandırmağı tələb etdilər. Guya cəbhə bölgəsində erməni uşaqlarının və qocaların öldürülməsi barədə yalan məlumat yaymağa başladılar. Bununla bizə təzyiq göstərməyə çalışdılar.

Bu siyasət, bu mübarizə bu gün də davam edir. Bu gün də beynəlxalq miqyasda Aprel döyüşlərinin tarixi əhəmiyyəti ilə bağlı fikir mübadiləsi aparılır. Dünyanın hər yerində erməni lobbisi haray salaraq Aprel döyüşlərində Azərbaycan Ordusunun erməni ailələrini, əsgərlərini qırdığını iddia edirlər. Ermənistan hakimiyyətinin müəyyən dairələri isə Aprel hadisələrini qələbə kimi qələmə verirlər. Lakin bizə gəldikdə, Azərbaycanın xaricdəki diaspor təşkilatları bu istiqamətdə doğrudan da böyük işlər görüblər. Elə diaspor nümayəndələri də var ki, Aprel döyüşlərinin əhəmiyyətini azaltmağa çalışırlar. Müxtəlif fikirlər yayırlar ki, guya "Azərbaycan Ordusunun zəif olması Aprel döyüşlərində üzə çıxdı, Azərbaycan məğlubiyyətə uğradı".

Belə fikirlərlə əslində bizim milli dövlətçilik maraqlarımıza uyğun gəlməyən təbliğat aparırlar.
Biz uzun müddətdir ki, Xocalı soyqırımının mahiyyətinin dünya ictimaiyyətinə çatdırılması üçün böyük kampaniya aparırıq. Xocalıya ədalət" kampaniyası çərçivəsində ilbəil Xocalı soyqırımını tanıyan dövlətlərin sayı artır. Artıq bu dövlətlərin sayı iyirmiyə yaxınlaşır. Biz xarici ölkələrdə Xocalı məsələsindən danışanda "bizi belə qırıblar" deməklə özümüz haqqında zəif, gücsüz xalq təsəvvürü yaradırıq. Bunun özü də bizim xeyrimizə olmayan bir məsələdir. Bu mənada Yunus Oğuza bir yazıçı kimi çox təşəkkür edirəm ki, Aprel döyüşlərinin ertəsi günü fəaliyyətə başladı və qısa müddət ərzində bu mövzuda ilk romanı ərsəyə gətirdi.

Bu əsl vətənpərvərlik, əsl qəhrəmanlıq nümunəsi, bir yazıçı mövqeyidir. Romanın mövzusu Aprel döyüşlərinin qəhrəmanlarıdır, xüsusən polkovnik Murad Mirzəyev və onun döyüş yoldaşlarının həyat yolundan bəhs edir. Bu insanın fəaliyyətini mən də izləmişəm, sözün həqiqi mənasında Milli Qəhrəman, əsl Azərbaycan hərbçisidir. O, şücaəti ilə Azərbaycan xalqının nəyə qadir olduğunu göstərib ki, həmin qəhrəmanlıq da bu əsərdə əksini tapıb».

Qafar Əliyev əlavə edib ki, gələcəkdə də təkcə Xocalı hadisələri deyil, eləcə də Aprel döyüşlərinə dair bədii ədəbiyyatın, xüsusən "Ovçu" kitabının başqa dillərə tərcümə olunub yayılması məqsədəmüvafiqdir. Xarici ölkələrdə görsünlər ki, bir xalq təkcə hücuma, təcavüzə məruz qalan, qırılan, soyqırıma uğrayan bir millət deyil, həm də öz gücünü, öz əzmkarlığını göstərməyə qadir olan bir xalqdır.

Ay An


Facebook

Instagram

Youtube

SORĞU


Koronavirusla mübarizədə nə edirsiniz?